بیر خبر واردی کی شعریم دئمه ییندن اوتانیر

کی قیزیل گول بوداغی اوسته؛ تیکانلار دولانیر

بیلمز البته کی ظولمات دا  گزن بایقوشلار

گولومون عشقینه خاطیردی کی آی پارچالانیر

بیز فرانسه عطیرین، ادکلنین، ایسته می ریک

کی محمد عطیری، کل جهانه جالانیر

باغبان تانریدی، معلوم دی، خزان گورمه یه جک

هر گولستان کی محبت چراغی اوردا یانیر

ائله روحیم قوشی غمگین اوخویور؛ قارداشلار!

کی دونوب نیسگله بیر سوز دوداغیمدا اوتانیر:

عربی ئولکه ده غیرتلی کیشی قالمیوب هئچ؟!....

کی قیزیل گول بوداغی اوسته تیکانلار دولانیر

..........................................

شاعر :  ابراهیم قبله ارباطان