سِ خاکریز دل غم جا گِرُته/// بچه ی دل بونه ی لالا گرته
للا لا لا، للا لا لا للایی/// دلم تنگه دلم تنگه خدایی
سر کُنجِ تیم غم چینه کرده/// یه دنیا دل هوی بابینه کرده
وطر روغن که سُتِه ولایه بسه/// یه داغی سر دلم خین مایه بسه
اگر تو هم هوی صحرانه داری/// هوی دشتِ گلِ نعنانه داری
و یا ایخی و مجنون چی بدونی/// قصه ی هف لشکره از بر بخونی
اگر که عاشقی و وایه مندی/// بچه ی رُنجی و مهلی دردمندی
و یا چی گنجِ مش سی گل وَپیتی/// و من باغی و مث بلبل وپیتی
اگر ایخی حسین آسا بمیری/// لوت خشک بو ولوی دریا بمیری
بشین تا سیت بگم مجنون چه وابی/// قصه ی فرهاد بی سامون چه وابی
مطیل نیسی، روایت درد ایله/// گپ از خمپاره و زلفِ چویله
للا لا لا للا لا لا للایی/// سرِ شونِ شهید خُندن چه وابی
شوِ سِهیِه زمسون بی که رتیم/// هوا لیلی و بارون بی که رتیم
دلم اوشو خدایی می پرس بی/// وطر کوک بهاری مهس مهس بی
دل پیر تا جوونمو شوخ و شنگ بی/// صدی الله اکبرمو قشنگ بی
همه جا تیر و ترکش پر گِرُه شو/// وَ مِن تش وربریسس جا گره شو
شلمچه من تش و دید دیده ویبی/// هم اوشو بی که گلل چیده ویبی
دلِ دِشمن وَ دسمو پُر وَ خین بی/// بیابونل وَ خینشو شلشلین بی
فقط بَی تش تفنگل حالی و یبی/// شوی که گرگ هار گوش مالی ویبی
للا لا لا للا لا لا للایی/// دلم تنگِ دلم تنگِ خدایی
نه ایگم میخک و مهلو نبوهه/// گپی وّ خالِ بالَی لو نبوهه
اگر که شهرِ شهرزاد غصه داره/// تیه ی کالش یه دنیا قصه داره
اما دیو پلشت فرهادَه نیده/// زنش هم قصه ی شهرزاده نیده
مو ایگم خو منِ خومون نیایه/// گُرازی شو وَ با اومون نیایه
اگه کُرل همش سیگاری وابن/// دورل رنگ و رنگ بازاری وابن
اگه دشمن بفهمه که وَخوییم/// و دیمِ پیل پلا مهلی وَ دوییم
خور و گلل صحرا نداریم/// میونه ی بَی شط و دریا نداریم
دوبارم گرگ هار شیر زهله ویبو/// تمومِ خاکمو خین چهله ویبو
دوبارم شو وَ شو کفتار ایایه/// زبونم لال بگم قاجار ایایه
بَوَی پیرم تَوِ اوشونه داره/// هنی هم گپ تفنگ برنونه داره
مو ایگم تا ککی جونیم بدونه/// یَوِلا شوک سر گردو نخونه
من ای باغ جایِ شوک و مارملک نی/// خشون دونن که لر بی ارخلک نی
تفنگ کُر همیشه با قطاره/// همیشه مونس یابو سواره
مو ایگم تا دورل ایل بدونن/// سرِ شونه شهیدلمو بخونن
مو ایگم تا که بلبلل بدونن/// وَ داغ دل، وَ داغ دل بخونن
للا لا لا للا لا لا للایی/// سرِ شونه شهید خُندن چه وابی
